اسلام آباد۔28نومبر(اے پی پی) وزیراعظم محمد شہبازشریف آکھیے قومی سلامتی دا براہ راست تعلق معاشی سلامتی توں اے ، سٹاک ایکسچینج اچ تاریخی ریکارڈ ودھارا ، مہانگ دی شرح گھٹ ، آئی ٹی سودھے ٻئے شعبیں اچ برآمدات اتے ترسیلات زر اچ چنڳاں ودھارا تھئے ، اپݨی ساری توانائیاں اتے وسائل ملکی معیشت دے استحکام سانڳے بروئے کار گھن آندے پئن ، زراعت، صنعت، برآمد کنندگان اتے حکومت کوں ملکی ترقی سانڳے رل تے کم کرݨا ہوسی ، اسلام آباد اچ مسلح لشکر کشی دے ذریعے غیر یقینی تے افراتفری پیدا کرݨ دی کوشش کیتی ڳئی ، پاکستان دے دشمن سارا کجھ تباہ کرݨ چاہندن ۔ اے ڳالھ انھاں نیشنل ڈیفنس یونیورسٹی اچ 26ویں سکیورٹی ورکشاپ توں خطاب کریندے آکھی ۔ وزیراعظم شہباز شریف آکھیے قومی سلامتی دا براہ راست تعلق معاشی سلامتی توں اے ، ݙوہیں نال نال ہن ، سٹاک ایکسچینج اڄ ھک لکھ پوائنٹس دی حد پار کرڳئے، وفاقی حکومت اتے سارے فریقاں وچال مربوط رابطے تے ٹیم دی انتھک کوششاں پاروں اے کامیابی حاصل تھئی اے ، اے کاروباری رجحان اے، ملک سدھے پاسے ٹردا پئے ، گزشتہ توں پیوستہ ݙینھ جیڑھا کجھ اسلام آباد اچ تھئے ایں توں سٹاک ایکسچینج 4 ہزار پوائنٹس ڈھہہ ڳئی ، احتجاج ختم تھیوݨ دے بعد گزریل ݙینھ ایں اچ 3 ہزار پوائنٹس دا ودھارا تھئے تے اڄ ھک لکھ پوائنٹس دی حد عبور کرݨ تاریخی ریکارڈ اے۔ انہاں آکھیے برآمدات اتے صنعتاں اچ ودھارا تھیندا پئے ، پیداواری ملازمتاں دے موقع ملدے پئے ہوون ، بیورو کریسی فعال کارکردگی دا مظاہرہ کریندی پئی ہووے تاں معاشی سلامتی خود بخود تکڑی تھیندی اے ، بدقسمتی نال ماضی اچ معاشی ترقی سست رہی، ایندی مختلف وجوہات ہن، ایں اچوں خلوص نال پالیسیاں تے عملدرآمد نہ کرݨ، محنت اتے انتھک کوششاں دی کمی شامل ہن، ایندے نال نال ذہین پیشہ وارانہ کاروباری لوک ، استاد تے ماہرین دے ہووݨ دے باوجود معیشت ڈھاندی ڳئی ۔ انھاں آکھیے اساکوں ہݨ وی کئی چیلنج دا سامݨا اے، جون 2023ء اچ پاکستان دے دیوالیہ ہووݨ دا خطرہ ہئی ، ایں تے اساں سیاسی پوائنٹ سکورنگ نی کیتی تے آئی ایم ایف نال جامع مذاکرات کرتے ملک کوں دیوالیہ تھیوݨ توں بچائے ، اساں کنے ایں توں انڄ کوئی رستہ کائناں ہئی ، آئی ایم ایف نال ول مذاکرات کیتے ڳئے ۔ انہاں آکھیے ماضی اچ منصوبے بݨا تے نظر انداز کیتے ڳئن ، اساں آپݨے مںصوبیں تے من و عن عملدرآمد کریسن ، ہوم گرائونڈ پلان بݨایا ڳئے ، پوری پاکستانی قوم نال رل تے ایں منصوبے تے عمل کریسن انہاں آکھیے ملک دا معاشی منظرنامہ انتھک محنت اتے کوششاں نال تبدیل کیتا ونڄ سڳدے، معاشی چیلنجز دے نال نال سکیورٹی چیلنجز دا وی سامݨا اے، پاک فوج، قانون نافذ کرݨ آلے اداریں تے پوری قوم دہشت گردی کوں شکست ݙیوݨ سانڳے قربانیاں ݙتن ، سابق وزیراعظم محمد نواز شریف دے دور اچ ملک دی بہادر افواج، قانون نافذ کرنے آلے اداریں تے عوام دہشت گردی کوں شکست ݙتی، دہشت گردی دے خلاف جنگ اچ 80 ہزارلوک شہید تھئن تے 130 ارب ڈالر دا معاشی ضیان تھئے ۔ اساکوں انھاں ضیان دے اثرات دا سامݨا کرݨا پیا ، خیبرپختونخوا اتے بلوچستان اچ دہشت گردی دے واقعات تھیندے پئن ، پاکستان دشمن عناصر پاکستان دے دشمناں نال رل تے آپݨے مذموم ایجنڈے تے کم کریندے پئن ، پارا چنار اچ بے گناہ پاکستانیاں کوں قتل کیتا ڳئے انہاں آکھیے اسلام آباد اچ لشکر کشی کیتی ڳئی ، احتجاج دی آڑ اچ ہزاراں لوکاں ہتھیاراں اتے اسلحہ نال دھاوا ٻولیے جیں توں غیر یقینی اتے افراتفری پیدا تھئی، او معاشی استحکام کوں تباہ کرݨ چاہندے ہن ۔ وزیراعظم آکھیے مہانگ دی شرح 32 فیصد توں گھٹ تے 7 فیصد تے آڳئی ، برآمدات اچ ودھارا تھیندا پئے ، ترسیلات زر، آئی ٹی برآمدات اچ چنڳاں ودھارا تھئےاے پاکستانی عوام دا خواب ہئی، پاکستان دے دشمن سارا کجھ تباہ کرݨ چاہندن ۔ انھاں آکھیے اساں کنے محدود آپشن ہن، اساں آپݨی ساری توانائیاں اتے وسائل ملکی معیشت دے استحکام سانڳے بروئے کار گھن آندے پیوں ۔ شہباز شریف آکھیے اساں ھک مٹھ تھی تے ملک دا مستقبل خوشحال بݨا سڳدوں بعد اچ شرکاء دے سوالاں دے جواب ݙیندے انہاں آکھیے ٻاہرلےخسارے اچ فرق کوں گھٹ کرݨ سانڳے برآمدات ودھاوݨ ناگزیر اے، ایں ویلھے ترسیلات زر 30 ارب ڈالر ہن ایںدے برابر برآمدات ہن، برآمدات تے مبنی پالیسی تے عمل کریندے پیوں جݙاں تئیں آپݨے وسائل نہ ودھیسوں تاں اوں ویلھے تئیں آپݨی آندیاںنسلاں تے قرضے دا ٻوجھ چڑھیسوں ایویں اساں نی کرسڳدے، گیس اتے پاور دے شعبیں اچ گردشی قرضہ سودھے ٻہوں سارے چیلنج ہن، اساں ھک مٹھ تھی تے انہاں مسئلیں نال نبݨݨ سانڳے بھرپور کوششاں کریندے پیوں ، بجلی چوری اتے ادارہ جاتی خامیاں مکاوݨ سانڳے متعلقہ وزارت کم کریندی پئی اے اساکوں ٹیکس نیٹ کوں توسیع ݙیوݨی اے، ٹیکساں اچ تاں ارباں روپے دی چوری تھیندی پئی اے ، ٹیکس ادا کرݨ آلیں کوں سلام پیش کرینداں ، انہاں دی حوصلہ افزائی سانڳے اقدامات کیتن ، اساں عوام کوں تعلیم تے صحت دیاں سہولتاں ݙیوݨیاں ہن، زراعت، صنعت، برآمد کنندگان اتے حکومت کوں ملکی ترقی سانڳے رل تے کم کرݨا ہوسی ۔ انہاں آکھیے ایپکس کمیٹی فیصلہ کیتے جو بلوچستان اچ غیر ملکی حمایت نال جیڑھی سازش تھیندی پئی اے انہاں دا خاتمہ ٻہوں ضروری اے ۔بلوچستان اچ آپریشن شروع تھی چکیے اے عزم استحکام دے تحت بلوچستان اتے عوام دی ترقی و خوشحالی نال جڑیے ۔ انہاں آکھیے 2018ء دے انتخابات دے بعد قومی اسمبلی دے اجلاس اچ میثاق معیشت دی تجویز ݙتی ہئی ، اڄ ول میثاق معیشت دی تجویز دا اعادہ کرینداں ، حکومت کاروبار نی کریندی بلکہ کاروبار دے ودھارے سانڳے سازگار ماحول ݙیندی اے ، مختلف اداریں اچ رائٹ سائزنگ اتے ڈائون سائزنگ کریندے پئن، خسارے دا شکار سرکاری ملکیتی اداریں اچ ارباں روپے دا ضیان تھیندے ، انھاں ارباں روپے دا ضیان بچیسن، حکومت، آرمی چیف جنرل سید عاصم منیر سودھے سارے اداریں دا ایں بارے یکساں مؤقف اے۔ انہاں آکھیے وزیر اطلاعات کوں ایں معاملے تے قوم کوں ݙساوݨ سانڳے جاندار بیانیہ وضع کرݨ دا آکھیے۔ انھاں آکھیے 2010ء دے این ایف سی ایوارڈ دے تحت دہشت گردی دے خلاف جنگ اچ خیبرپختونخوا کوں سارے صوبے ھک فیصد حصہ ݙیندن ، ہݨ تئیں انہاں کوں 600 ارب روپے مل چکن، حالی تئیں اتھاں سیف سٹی اتے محکمہ انسداد دہشت گردی قائم نی کرسڳدے، اساں ساریں کوں رل تے ملک اتے عوام سانڳے کم کرݨا ہوسی، سارے قائدین تے اشرافیہ رل تے ملک دی تقدیر بدلݨی اے، اے محنت، امانت اتے دیانت توں ممکن اے، اساں انتھک محنت اتے لگن نال آپݨی کامیابی حاصل کرسڳدن ۔ تقریب اچ وفاقی وزرا، اعلیٰ عسکری حکام تے زندگی دے مختلف شعبیں نال تعلق رکھݨ آلے لوکاں شرکت کیتی۔
