اسلام آباد۔18جون (اے پی پی):وزیر مملکت خارجہ امور حنا ربانی کھر آکھیے جو گزریل ݙینھ برلن جرمنی اچ ایف اے ٹی ایف دا جائزہ اجلاس مک ڳئے ۔ ایں موقع تے ایف اے ٹی ایف دے انٹر نیشنل کوآپریشن ریوگروپ (آئی سی آر جی) دی پاکستان دے 2018اتے 2021 دے ایکشن پلان دے حوالے نال تجویزاں دا جائزہ ڳھدا ڳیا ، ہفتے کوں اتھاں میڈیا بریفنگ توں خطاب کریندے ہوئیں وزیر مملکت حنا ربانی کھر آکھیے جو 2018 دے ایکشن پلان دے حوالے نال ایف اے ٹی ایف کوں بھیجی ڳئی 11 ویں رپورٹ دا جائزہ ڳھدا ڳیا ، انہاں آکھیے جو ایف اے ٹی ایف متفقہ طور تے من ڳھدے جو پاکستان دی طرفوں سارے ایکشن آئٹمز تے عملدرآمد کرڳھدا ڳئے تے 2018 دے ایکشن پلان تے پاکستان دی طرفوں مکمل عملدرآمد دے بعد ایں کوں بند کیتا ویندے ، انہاں مزید آکھیے جو 2021دا ایکشن پلان زیادہ تر منی لانڈرنگ دے مسئلیں متعلق ہئی تے ایں تے پاکستان ترائے پراگریس رپورٹس جمع کرائن ۔ انہاں آکھیے میکوں اے ݙسیندے ہوئیں خوشی تھیندی پئی اے پاکستان ایکشن پلان دے سارے ست پوائنٹس کوں ݙتے ڳئے ویلھے توں ھک سال پہلے پورا کر ڳھدے ، جیں اچ پاکستان اے ایم ایل / سی ایف ٹی دے حوالے نال جامع ریفارمز تے اقدامات کوں یقنی بݨائے ۔ وزیر مملکت آکھیے جو پاکستان دے مثبت تے تکھے اقدامات دی ایف اے ٹی ایف دے سارے ارکان ٻہوں تعریف کیتی اے ، ایف اے ٹی ایف من ڳھدے جو پاکستان ݙوہیں ایکشن پلان کوں مکمل کر ڳھدے ، اے ایم ایل / سی ایف ٹی سسٹمز کوں بہتر بݨاوݨ دے حوالے نال ساݙی بہترین کاوشاں تے عزم کوں منیا ڳئے ۔ایف اے ٹی ایف دے اجلاس اچ جامع تے بامعنی ڳالھ مہاڑ توں بعد ایف اے ٹی ایف متفقہ طور تے فیصلہ کیتے جو پاکستان سارے ٹیکنیکل بینچ مارکس کوں کامیابی نال مکمل کیتے تے ݙوہیں ایکشن پلانز دے حوالے نال ساݙیاں ساریاں ضرورتاں کوں مکمل کرڳھدے ۔ ایں شاندار کامیابی توں بعد ایف اے ٹی ایف تکنیکی ٹیم دے دورہ پاکستان دی منظوری ݙتی اےتاں جو موقع تے اصلاحات تیں عملدرآمد دے طریقہ کار دا جائزہ ڳھدا ونڄ سڳے۔ ایف اے ٹی ایف دے ایکشن پلانز دی کامیابی تکمیل اتے ایف اے ٹی ایف دی طرفوں پاکستانی اقدامات کوں منیندے ہوئیں ایف اے ٹی ایف آکھیے جو پاکستان گرے لسٹ توں نکلݨ کیتے ھک قدم پرے ہے ، حنا ربانی کھر آکھیے جو موقع تے موجود اقدامات دے جائزہ دے حوالے نال یف اے ٹی ایف دی تکنیکی ٹیم دا دورہ باضابطہ طریقہ کار دے تحت ضروری اے ،جیں توں بعد پاکستان ایف اے ٹی ایف دی گرے لسٹ توں باقاعدہ طور تے نکل ویسی ، اساں ایف اے ٹی ایف نال سانجھی مشاورت دے ذریعے متفقہ مناسب تاریخاں دا جائزہ گھندے پیوں تاں جو اکتوبر 2022 ایف اے ٹی ایف دے آندے اجلاس توں پہلے تکنیکی ٹیم دے دورے دے انتظامات کوں وختی چھیکڑی شکل ݙتی ونڄ سڳے۔
