اسلام آباد۔5جولائی (اے پی پی):وزیرداخلہ شیخ رشید احمد آکھیے جو جے کوئی اوکھا ویلھا آیا تاں پاکستان دی افواج ، حکومت ، اپوزیشن سودھے پوری قوم ھک ہوسی، اساݙی حالات نال نبݨݨ دی پوری تیار اے ، صورتحال تے پوری نظر رکھی ہوئی اے ، وزیراعظم عمران خان دی حکومت دی خواہش ہے جو افغانستان یا دوحہ اچ سارے افغان رہنما اتے قیادت رل ٻہہ تے صورت حال دا او جیڑھا وی حل کڈھن اساکوں قبول ہوسی ، بھارتی خفیہ ایجنسی را اتے ایندے ذیلی ادارے پاکستان اچ کہیں تخریب کاری توں نئیں ہٹدے پئے ، کراچی اچ وی او گروہ وٹھیا ڳئے جیں دا اعلان مناسب ویلھے تے کیتا ویسی ،افغانستان توں نیڑے 7 سرحدی جہیں تے آوںڄ کوں ویلھے دے تقاضیں دے مطابق تیارکریسوں۔ اے ڳال انہاں سنوار کوں وزارت داخلہ اچ اجلاس دے بعد پریس کانفرنس توں خطاب کریندے ہوئیں آکھی اے ۔ وزیر داخلہ آکھیے انہاں کوں امید اے جو افغانستان توں ایں واری او حالات نہ ہوسن جیڑھے پہلے دے دور اچ ہن ، انہاں آکھیے نادرا چیئرمین کوں ہدایت کیتی اے جو سارے پاکستان اچ نادرا دے دفتر دے اندر جیڑھا گند اے اینکوں صاف کیتا ونڄے ۔ کراچی اچ پہلے ہی 30 ایجھے لوکاں دے خلاف کاروائی کیتی ڳئی اے جیڑھے غلط شناختی کارڈ جاری کریندے ہن ۔ 19 لوکاں کوں معطل کیتا ڳئے ۔ ضرورت پئی تاں ایں معاملے تے جے آئی ٹی وی بݨائی ویسی ۔ انہاں آکھیے جو وزیر اعظم عنقریب ازبکستان دا دورہ کریسن جتھاں ݙو اہم معاہدیں تے دستخط کریسن ۔ 5 توں7 ݙینھ دا ویزہ انٹری تے ݙتا ویسی ۔لاہور تے تاشقند دے درمیان پی آئی اے دیاں پراوزاں وی شروع تھی چکئن ۔ انہاں آکھیے ݙوہیں ملکاں وچال نویں دور دا آغاز تھیندا پئے ۔ وزیر داخلہ آکھیے جو ایف آئی اے اچ1145 آسامیاں کیتے 12 لکھ لوکاں درخواست ݙتی اے ۔ ایں عمل کوں مکمل کرݨ کیتے 13 کروڑ روپے دی لوڑھ اے جیڑھے جو اساں اپݨے وسائل ٹوں ݙیسوں ۔ 26 جولائی توں ٹیسٹ گھںݨ دا عمل شروع تھیسی۔ 509 مزید نوکریاں ݙتیاں ویسن ۔ وزیرداخلہ آکھیے جو افغان بارڈر کوں مستقبل دی ضرورت نال ہم آہنگ کیتا ویسی ۔ طورخم اتے چمن تے ایف آئی اے ، ایف سی اتے قانون نافذ کرݨ آلے متعلقہ ادارے پہلے توں ہی آمد و رفت دے حوالے نال ضروری قانونی تقاضے پورے کرݨ تے مامور ہن ۔ چمن سرحد کوں وی 30 جولائی توں الیکٹرانک کرݙتا ویسی ، ایف آئی اے اچ وݙے عرصے توں مختلف آسامیاں تے تعینات افسراں اتے اہلکاراں دے تبادلے دی ہدایت کیتی ڳئی ہئی ، ایں حوالے نال احکامات تے پورا عمل نی تیا ۔ ڈی جی ایف آئی اے کوں ہدایت کیتی اے جو 72 گھنٹے اچ ایجھے اہلکاراں کوں بدالیا ونڄے جیڑھے وݙے عرصے توں مختلف آسامیاں تے بیٹھن۔
