اسلام آباد۔27جنوری (اے پی پی):وزیر خارجہ مخدوم شاہ محمود قریشی خمیس کوں متحدہ قومی موومنٹ دے پارلیمانی راہنما و ممبر قومی اسمبلی خالد مقبول صدیقی، وفاقی وزیر انفارمیشن ٹیکنالوجی امین الحق، ممبر قومی اسمبلی کشور زہرہ دے نال ٹیلیفونک رابطہ کیتے اتے کراچی اچ پرامن مظاہرین تے پولیس دے ناروا تشدد دی شدید مذمت کیتی۔وزیر خارجہ آکھیے جو پرامن احتجاج کوں لاٹھیاں تے شیلنگ دے ذریعے منتشر کرݨ جمہوری حق دی نفی اے۔وزیر خارجہ ایم کیو ایم دے کارکن اسلم دی شہادت تے اظہار تعزیت کیتے اتے آکھیے جو پولیس تشدد توں ایم کیو ایم دے کارکن دی اکھ دا ضیان افسوسناک اتے قابلِ مذمت اے، مخدوم شاہ محمود قریشی آکھیے جو متحدہ قومی موومنٹ دی تریمتاں تے پولیس تشدد دی جیں قدرمذمت کیتی ونڄے گھٹ اے ، جیویں ایم کیو ایم دے منتخب ایم پی اے کوں کراچی دیاں سڑکاں تے گھیلیا ڳئے او پوری قوم ݙٹھے ۔شاہ محمود قریشی آکھیے جو کل دے افسوسناک واقعے توں جمہوریت دے کوڑے دعویداراں دی قلعی کھل ڳئی، آئے ݙینھ جمہوریت دا درس ݙیوݨ آلیں دا اصلی چہرہ ساریں ٹی وی سکرینز تے ݙٹھے ۔ شاہ محمود قریشی آکھیے جو سندھ دا بلدیاتی قانون، ماسوائے پیپلزپارٹی، ساریاں جماعتاں مسترد کر چکئن ، حتی کہ پی ڈی ایم اچ شامل پاکستان مسلم لیگ نون وی مسترد کر چکی اے۔ایں قانون دے خلاف اسمبلی دے اندر احتجاج اتے اسمبلی دے ٻاہروں جماعت اسلامی دا دھرنا مسلسل جاری اے، مخدوم شاہ محمود قریشی آکھیے جو سندھ دا بلدیاتی نظام، عوام دے درمیان مذاق بݨ تے رہ ڳئے ۔وزیر خارجہ مخدوم شاہ محمود قریشی پی ٹی آئی دے وائس چیئرمین دی حیثیت نال ، ایں قانون دی فوری تبدیلی تے زور ݙتے۔
