واشنگٹن۔13ستمبر (اے پی پی):امریکا اچ پاکستان دے سفیر مسعود خان زور ݙتے جو پاکستان اچ سیلابی صورتحال خطرناک تھیندی ویندی اے ایں کیتے عالمی برادری پاکستان حکومت کوں ماحولیاتی تبدیلی پاروں تھیوݨ آلی تباہ کن صورت حال نال نبݨݨ دے قابل بݨاوݨ کیتے مزید مدد کرے۔ ترک خبر رساں ادارے کوں انٹرویو اچ انہاں آکھیے جو سیلاب ماحولیاتی تبدیلی دا براہ راست تے تباہ کن نتیجہ ہن ، اساکوں امید اے جو بین الاقوامی برادری خاص طور تے ترقی یافتہ ملکاں تے اقوام متحدہ ماحولیاتی تبدیلی نال نبݨݨ کیتے پاکستان دی مدد کیتے اڳوں آون ، انہاں آکھیے جو موسمیاتی تبدیلیاں دے مجموعی ضیان ٻہوں وسیع ہوسن ۔ انہاں آکھیے اے اوکھی صورت حال اے کیوں جو پاکستان اچ ایں ویلھے سیلاب جیہی وݙی تباہی نال ٻئی مشکلات دا وی سامݨا اے، جیں پاروں لوک بے گھر تھئن ۔پاکستانی سفیر اقوام متحدہ دے سیکرٹری جنرل دے دورہ پاکستان تے سیلاب توں متاثرہ پاکستانی عوام دی مدد کیتے ترکیہ حکومت اتے سوسائٹی کوں متحرک کرݨ تے ترک صدر رجب طیب اردوان دا شکریہ ادا کیتے ۔
