اسلام آباد۔6دسمبر(اے پی پی):پاکستان بھارتی حکومت تے زور ݙتے جو او اقلیتاں خاص طور تے مسلماناں تے انہاں دیاں عبادت گاہواں دی حفاظت، سلامتی اتے تحفظ یقینی بݨاوے۔ ہندو انتہا پسنداں دے ہتھوں تاریخی بابری مسجد دے 31 ویں یوم شادت دے موقع تے ترجمان دفتر خارجہ آپݨے ھک بیان اچ آکھیے اڄ بھارت اچ تاریخی ”بابری مسجد“ دے انہدام دی ھک افسوسناک یاد دہانی اے، اڄ دے ݙینھ 31 سال پہلے بھارتی قانون نافذ کرݨ آلے حکام دی موجودگی اچ ہندو جنونیاں دے ھک ہجوم ایودھیا اچ ایں صدیاں پراݨی مسجد کوں ݙھا ݙتے ۔ بیان اچ آکھیا ڳئے جو افسوسناک امر اے ہے جو بھارت دی اعلیٰ عدلیہ ایں نفرت انگیز فعل دے ذمہ وار مجرماں کوں نہ صرف بری کرݙتا بلکہ مسمار کیتی ڳئی مسجد دی جاہ تے مندر بݨاوݨ دی اجازت وی ݙتی ۔ترجمان اپݨے بیان اچ مزید آکھیے بھارت اچ اڳلے عام انتخابات توں کجھ مہینے پہلے ایں مندر دا افتتاح جنوری 2024 اچ متوقع اے۔ بیان موجب بابری مسجد دی شہادت دا سبب بݨݨ آلا مسلم مخالف جنون بدستور جاری اے ۔ بیان اچ پاکستان بھارتی حکومت تے زور ݙتے جو او اقلیتاں خاص کر مسلماناں اتے انہاں دیان عبادت گاہواں دی حفاظت، سلامتی اتے تحفظ یقینی بݨاوے۔
