لاہور۔7ستمبر (اے پی پی):وزیر اعظم دے معاون خصوصی عطا تارڑ آکھیے جو اساں سیلاب متاثرین دی مدد کریندے پیوں جݙاں جو پی ٹی آ ئی آلے سیاست کریندے پئن ،پی ٹی آئی دے رہنما پیسے گھن تے حساس اداریں دے خلاف بیان بازی کریندے پئن ،جیڑھا جو ادارہ ملکی دفاع دی خاطر جاناں قربان کریندا پئے تے سیلاب متاثرین دی مدد کیتے اپݨی ذمہ واریاں پوریاں کریندا پئے ، پی ٹی آئی انہاں دے خلاف گندی سیاست کریندی پئی اے ،پی ٹی آ ئی چوراں دا ٹولہ اے جنہاں چار سال تئیں ملک کوں وݙی بے دردی نال لٹیے ۔اے ڳالھ انہاں میڈیا نال الویندے ہوئیں آکھی اے ۔ عطا تارڑ آکھیے جو اساں سیلاب متاثرین دی مدد کریندے پئن جݙاں جو پی ٹی آ ئی آلے سیاست کریندے پئن،انہاں کوں صرف اپݨی توشہ خانہ تے فارن فنڈنگ اچ کیتی ڳئی کرپشن کوں لکاوݨ دی فکر اے ، پی ٹی آئی دی بے حسی ایں حد تئیں ودھ ڳئی اے جو ایں ویلھے قدرتی آ فت دے دوران وی اپݨی سیاست کوں چمکاوݨ دی کوشش کریندے پئن ۔ انہاں آکھیے جو پی ٹی آ ئی دا ھک وی رہنما سیلاب متاثرین دی مدد کیتے باہر نی نکلیا اساں سیلاب متاثرین دی مشکلات کوں ختم کرݨ کیتے ݙینھ رات کم کریندے پئن جݙاں جو لوک سیاست سیاست کھیݙدے پئن ۔
