اسلام آباد۔4مئی (اے پی پی):وفاقی وزیر اطلاعات و نشریات مریم اورنگزیب آکھیے مکافات عمل کیا ہوندے اڄ قوم کوں نظر آندا پئے ، ݙوجھیں دی بیماری دا مذاق اݙاوݨ آلا اڄ وہیل چیئر تے ٻہہ تے عدالت نہ ونڄݨ دا بہانہ بݨیندا پئے ، کلثوم نواز دی بیماری اتے ول موت، نواز شریف دی بیماری اتے شہباز شریف دی چیل درد دا مذاق اݙاوݨ آلا اڄ وہیل چئیرتے ٻہہ تے کوڑ مریندا پئے ، آپݨے ھک بیان اچ وفاقی وزیر اطلاعات مریم اورنگزیب عمران خان کوں چیلنج کیتے جو انہاں کوں جیں جیں توں خطرہ اے عدالت ونڄ تے ثبوت ݙیون نتاں آپݨا منہ بند رکھن ۔ مریم اورنگزیب آکھیے فارن ایجنٹ بہروپیا اے جیڑھا حالات دے مطابق سکرپٹ اتے حلیہ بݨا گھندے ، گرفتاری دے ݙر توں او کھٹڑے دے تلوں تے ضمانت خارج تھیوݨ تے ݙر توں وہیل چیئر دا ڈرامہ رچیندے ۔ انہاں آکھیے فارن ایجنٹ دے پیراں تے دٻاؤ کائنی ، انہاں دے دماغ تے سازشی دٻاؤ اے۔ مریم اورنگزیب آکھیے وہیل چیئر تے ٻہہ تے الزام لاوݨ دی بجائے او عدالت ونڄ تے ثبوت پیش کرن جو انہاں دی جان کوں کیں کیں توں خطرہ اے۔ انہاں آکھیے عمران خان کوں خطرہ ہݨ صرف فارن فنڈنگ، توشہ خانہ، ٹیریان کیس توں اے۔ ایں کیتے گولی، پلستر، ڈٻے، وہیل چیئراتے الیکشن دا بہانا بݨیندے پئن۔ انہاں آکھیے عمران خان کوں جݙاں وی عدالت سݙیندی اے تاں او گولی، پلستر، معذوری، بالٹی ڈٻہ دا بہانہ بݨیندن تے ہݨ وہیل چیئر دا ڈرامہ رچیندے پئن ۔ انہاں آکھیے عمران خان پہلے اپݨی حکومت ہٹاوݨ دا ملبہ امریکا تے پاتے ، سائفر دا ڈرٹی کھیل کھیݙیا، ول امریکا توں معافی منگ تے جنرل باجوہ، ول آصف علی زرداری اتے ول محسن نقوی تے ملبہ پاݙتے۔ انہاں آکھیے عمران خان چار سال دی ناکامیاں اتے اسمبلیاں بھنݨ دا ملبہ جنرل باجوہ تے پاتے ، شہدا، اداریں تے انہاں دی قیادت دے خلاف اندرلے تے ٻاہرلے ملک غلیظ مہم چلاوݨ آلا ول الزام تراشی کریندا پئے ۔ انہاں آکھیے عمران خان قوم کوں گھراں توں کڈھݨ توں پہلے خود تاں گھرتوں ٻاہر نکلن۔ پہلے کالی ٻالٹی توں منہ تاں ٻاہر کڈھݨ دا اعلان کرن ، ول قوم کوں ٻاہر کڈھݨ دا اعلان کرن۔ انہاں آکھیے چیف جسٹس دی تصویر تے جتیاں مارݨ کیتے وی ٻاہر نکلݨ دی کال عمران خان ݙتی ہئی ۔
